​३१ वी मुंबई महापौर चषक खो खो स्पर्धा २०१७-१८

बृहन्मुंबई महानगरपालिका आयोजित, महाराष्ट्र खो खो असोसिएशनच्या मान्यतेने, मुंबई खो खो संघटनेच्या विद्यमाने व वैभव स्पोर्ट्स क्लब यांच्या सहकार्याने ​३१ वी मुंबई महापौर चषक खो खो स्पर्धा २०१७-१८ दिनांक ८ ते ११ फेब्रुवारी, २०१८ या कालावधीत कै. केशवराव दाते मैदान, अगाशे पथ, दादर (पश्चिम), मुंबई येथे आयोजित करण्यात आली आहे.

या स्पर्धेचे उदघाटन मुंबई शहराचे महापौर मा. श्री. प्रिं. विश्वनाथ महाडेश्वर यांच्या शुभहस्ते गुरुवारी दि. ८ फेब्रुवारी, २०१८ रोजी सायंकाळी ठीक ६:०० वाजता होईल. या कार्यक्रमास प्रमुख पाहुणे म्हणून स्थानिक नगरसेविका सौ. प्रीती पाटणकर, महाराष्ट्र खो खो असोसिएशनचे स्पर्धा निरीक्षक श्री. कमलाकर कोळी (सहकार्यवाह – महाराष्ट्र खो खो असोसिएशन) सुद्धा उपस्थित राहणार असून सोबत संघटनेचे सर्व मान्यवर पदाधिकारी व कार्यकारीणी सदस्य हेही उपस्थित राहतील.

सदर स्पर्धा हि जोड जिल्हा स्तरावरील असल्याने मुंबई शहर व मुंबई उपनगर या दोन्ही जिल्ह्यातील अनेक मात्तबर असे पुरुष व महिलांचे संघ या स्पर्धेत सहभागी होणार आहेत. या स्पर्धेची खास बाब म्हणजे पुरुष व महिला गटाबरोबरच व्यावसायिक पुरुष संघाची जिल्हा अजिंक्यपद स्पर्धा सुद्धा या दरम्यान घेण्यात येणार असल्याने प्रेक्षकांना अनेक राष्ट्रीय व आंतरराष्ट्रीय पातळीवर खेळलेल्या मात्तबर खेळाडूंचा प्रदर्शनीय खेळ या निमित्ताने पहावयास मिळणार आहे.

स्पर्धेचा बक्षीस वितरण व समारोप समारंभ रविवार दिनांक ११ फेब्रुवारी, २०१८ रोजी रात्रौ ठीक ८:०० वाजता संपन्न होईल. हा कार्यक्रम शिवसेना नेते मा. श्री. प्रिं. मनोहर जोशी, आमदार श्री. सदा सरवणकर, उपमहापौर मा. सौ. हेमांगी वरळीकर व नगरसेविका सौ. विशाखा राऊत यांच्या उपस्थितीत होईल.